föstudagur, ágúst 29
Ótrúlegt! Ég er hundveik. Sit í skrifstofunni minni, í þrjátíu stiga molluhita; klukkan er að nálgast tólf á miðnætti og í fjarska heyri ég í þrumuveðrinu ógurlega sem nú skekur hið fagra fylki New Jersey. Það er ekkert eins óþægilegt og að sitja í raka og hita og þurfa að vefja nælonsjali utan um hálsinn. Ef kvefið drepur mig ekki, þá verður það gerviefnaónæmi.
Stórfréttir dagsins. Ég held að ég eigi ekki eftir að geta haldið við fjárhagsáætlunina mína góðu. Fór nebbnilega í IKEA í dag. Er enn hálf dösuð eftir þessa frægðarför, og ég get ekki rétt úr bakinu mínu almennilega eftir að hafa borið upp allar nýju bókahillurnar. En júpplíjey. Nú loksins verður almennnilegt pláss fyrir bækurnar mínar.
En nú er ég farin að sofa (almennilegt föstudagskvöld þetta) og krosslegjum öll fingurnar í þeirri von að kvefið verði farið úr mér á morgun.
23:36
